100 days left

                                                              NEI HOU. :-)

Ich chan mich na guet erinnere won ich verzwiflet min erste Brief gschriebe han vo da und uf de Rücksite gschribe han '308 days left'.. damals hani denkd dass de Tag wos denn nur na 100 Täg wird gah bisi wider zrugg mun nie wird cho. Ehrlichgseit hani damals öfters nidmal würklich amich selber glaubt und denkd dassi den vilicht sowiso wider zrugg bin ide Schwiz willi denkd han ich bin efacht z schwach zum warte bises besser wird. Weni ezt dradenk lachi würklich scho fast und denk we naiv ich gsi bin. Aber das alles ghört halt dezue. Und ezt isch de Tag da woni na 100 Täg han bisi wieder nach 10 Mönet und 1 Wuche is Flugzüüg stige und zrug id Schwiz chume..


Wie ihr ja alli scho wüssed gahts mir würklich guet im Moment da. Han würklich super Fründe gfunde und au immer wieder neui intressanti Sache zum mache am Wuchenendi. Also ich bin froh dassis usghaltet han ide erste Monet demiti ezt na mini letste Mönet i volle Züüg gnüsse chan! Bin würkli zimlich glücklich im Moment.:) Obwohl ich mun zuegäh dassi chli schwirigkeite gha han demit  2 grossi kulturelli unterschid zimlich heftig zgspüre, vorallem de zweiti isch ganz neu gsi. aber devo hani natürli namal umso meh glernt. Ich find das isch au würklich sehr interessant zum das wo alli über die chinesischi Kultur seged doch namal richtig bestätigt becho.

S' einte isch das würklich nid direkt gseit wird, wenn eim epis nid passt. Das hani scho bevori nach Hong Kong cho bin ghört und mir aber denn am Afang woni da anne cho bin aber denkd han nei das segi doch gar nid so will mini Gastmuetter scho zimli direkt gsi isch meistens und mir au gseit het wen sie es problem het den wird sie es mir immer klar und dütlich sofort sege. Aber jetzt isch mir würklich bewusst, dass sobalds öppis isch wo ihne nöd passt aber mer nid offesichtlich en grosse fehler begange het, sies würklich nid seged. Ich gange jetzt am Wuchenendi hald amix weg bis am halbi 10ni und bin den vorm 11i dihei. Und obwohl mis Gastmami mir zerst gseit het ja wenn mini richtige Eltere das ok findet denn ischs ihre eiglich total glich und ich chan mache was ich will, isch das überhaupt nid eso.Wie ich das merke? Segemr mal ich chume  hei am halbi 11i vomene lange Tag unterwegs, denn wirdi zerst mitmene chalte 'Hi' begrüesst und sust meh oder weniger ignoriert.Logischerwis merk ich dasses demfall mis Gastmami nid eso guet findet. Das isch den au relativ schwer für mich will ich den isone chalti nid würklich willkomme heissendi Atmosphäre zruggchume womr sich den alles andere als dihei fühlt. Aber das mun ich halt jetzt so erträge will das isch ja au mini Entscheidig gsi. Ich chenti natürlich nie mini Fründe am Abig treffe und immer spötistens am 9i diheime si und defür weniger so die chalti Site vo minre Gastmuetter z'gspüre kriege. Aber zum immer dihei sitze und defür anderi glücklich zmache bin ich ja ezt au nid da. Das han ich am Afang viel z fest gmachd, efachd glueget was all andere glücklich macht und nid unbedingt mich selber. Natürlich gangi nid ständig weg und luege au dass ich am Abig au am Wuchenendi mit ihne diheime bin. Und au sust probieri natürlich scho au immerno mini Gastfamilie glücklich zmache. Das isch würklich öppis wo mich extrem müed macht. S probiere immer allne recht zmache und im hinderchopf immer de Gedanke zha '' uii nei ich mun hei zrug zude gastfamilie.. uii was isch wenn sie das falsch finded und dieses.. was isch wen sie mal hessig werded... scho 8ii ui ich mun hei.. ''( so eppe gahts amix imim Ghirn vor.. was würklich sehr astrengend isch über e lengeri Zit. Aber das ligt ja warschinlich au sehr efachd a mir selber und ich probier mis beste das alles efachd chli lockerer z'näh..)

Öppis anders wo zwar au eppis mitm obere echli ztue het isch, dass ich glernt han, dass wenn Chinese es Problem mitere Person hend wo zumene chlinere Konflikt wür füehre, denn wird die Person efach abgschobe und komplett ignoriert und falle glah. Und das ohni en Grund z'nenne. Es gilt : am beste efachd jede no so chlini Konflikt vermide.
Ich han da e chlini Gruppe vo local friends gha ( nume 2 devo zwar würklich relativ guet kennt ) und zerst hani miterlebt wie die ganz Gruppe de eint vo dene 2 gheie lah hett, klar, er het Fehler gmacht, aber so en guete Fründ efachd ohni ihm erchläre was s Problem isch efachd z ignoriere und abschiebe vom einte Tag uf de ander find ich persönlich zimlich denebet. Da hend den vieli vo ois Ustuschschüeler au probiert ihne echli vo oisere Kultur zlerne und mit Erfolg hends denn ihm nachmene Monet ignoriere  mal es bizli erchlärt wieso sie Problem hend mit ihm und wie er sich chönti verbessere.
Churz nachdem han ich öppe fast s'gliche erlebt mit mim sozege beste Fründ da. Vilichd findet vili ezt das zu privat zum efachd so da veröffentliche, aber ich gang ja nöd meh is detail und ich selber finde das würklich au uh e wichtigi ( wenn nid die wichtigsti ) spannendi Erfahrig woni mit de Kultur da gmacht han bis jetzt. Wenn mr nämlich selber so eppis erlebt ischs namal viel idrücklicher als wenmrs efachd gseht und verzellt bechund - logischerwis.
Es git ja vieli schöni Site ade chinesische Kultur, aber ich find das isch würklich öppis grosses wo Asiate na öppis chönd vo oisere westliche Kultur und Offeheit lerne ( au wenn die natürlich nid überall vorhande isch bi ois)!

Sust bin ich jetz na am probiere s beste us mim Kantonesisch zmache, was nid würklich guet isch, aber ich mun sege ich weiss eigentlich scho einiges.:-)
Meh tueni hald verstah als dassi selber rede chan. Ich gange jedi Wuche am Mäntig is Kantonesisch und schribe ide Freistunde ide Schuel flissig Characters imis Büechli.

Letsts Wuchenendi hani dörfe binere Chinese cooking class lerne wemmer fried rice und e art chicken mit lemon sauce chochet. Isch alles chli schnell gange und stressig aber echt lustig unds resultat uh fein! :-)


             
                                              
                              
                                  
                           




im Moment fangts Wetter au ah z'ändere is unagnehme.. Ich sitze jetzt da vorm Kompi und es isch sooo heiss obwohls eigli nid so heiss isch, aber efachd wahnsinnig schwüül und alles chleberig und wääh. haha. Aber das heisst es isch wieder Strandziit! :-) Nachm choche bin ich s erste Mal zu Shek O beach! Wahnsinnig schön. Scho woni mitm Minibus anegfahre bin, hani s Gfühl gha ich bin irgendwie i Griecheland oder so.. Scho lustig wie eim Hong Kong immer wieder überrasche chan.

                      
                                                        

WE LOVE HONG KONG. <3 HOME.

Sust im Moment freu ich mich sehr uf oise Beijing-Trip im Mai! AFS Hong Kong organisiert jedes Jahr so en Trip uf Beijing und natürlich hani scho sit em Afang mich druf gfreut und jetzt hends ois endlich Infos dezue gäh und ich han mich au gad gester agmeldet :) 

Oh und denn hani da na es video für oi alli wo mich mal es bizli kantonesisch wend rede ghöre oder mini Gastschwöster wend kennelerne oder mini Schueluniform wend gseh :-)

Ich han ehrlichgseit echli Angst das video zposte will ich befürchte dassi vilichd in trouble chume ide Schuel willi ide Uniform das Video gmachd han und vilichd nid nume gueti Sache sege.. Han zwar Schimpfwörter usezensiert ( die sind zwar aber am lustigste..), aber ich glaub au s wort 'crazy' wird eventuell als schlimm entfunde, aber bin mir nid sicher..ich seg au würklich gar nüt schlimms. :) sust entschuldigi mich hald den lieb und nimms wider use :) ps: Wer findet s dütsche wort ? ;) haha

                            

es gäbti natürlich immerno ganz viel z verzelle, aber ich hans gfühl ich schribe scho jetzt so efachd chli es durenand druflos und ich will oi ja uf kein fall nerve oder so! :-)


BIS GANZ GLI...

oiri Deliah

TAI KOK TSUI TEMPLE FAIR & OPEN DAY

Letste Sunntig bin ich iglade worde vonere Gastfamilie mit ganz viel anderne Ustuschschüeler und Familie go d Tai Kok Tsui Temple Fair luege. Mir hend e art VIP tickets gha und sind den au würklich so behandelt worde. Also s fernseh het ois immer gfilmet und au vode Paparazzis simmer verfolgt worde de ganz Abig. Isch würklich es lustigs Erlebnis gsi und au uh schön will ich ezt endlich au mal no de berühmti Dragondance ( oder idemfall eher Liondance) han dörfe gseh! :)

Zerst am Morge bin ich no mit minre Fründin Viki zu minre Schuel go Werbig für AFS mache am parents day, nacher hemmer ois na en typische HK Lunch gönnt bevor mr nach Mong Kok ad Temple Fair gange sind. Det hemmer den zerst de Liondance gseh - isch würklich unglaublich was die alles chönd und a wivil sache die glichzitig denke mönd ( zB gumped die umenand und tanzed, mönd immerna uf de ander genau luege und dönt au na d Wimpere vom Drache bewege und gumped in 4 meter höchi oder na meh umenand.) Würklich wahnsinnig schön! Und irgendwie au fast echli gfürchig. 

Spöter hets den adere Temple Fair jensti uftritt gäh. Isch na amüsant gsi. Mir sind ide erste Reihe gsesse und fast meh fotografiert worde we d Models wo gloffe sind ade Fashion show. 

Denn hemmer am Schluss au na en feine Znacht becho dete:) De ganzi Event isch eigli sowiso meh fürs ferseh gsi, am negschde Sunntig gsehtmr ois den au im TV. 

lunch mit Viki in einem typischen Hong Kong Restaurant, Instant Noodeln mit scrambled egg und toast und unserem geliebten iced milk tea

auf dem Weg nach Mong Kok, auch zu fuss gehts gut durch die Stadt

Lion(Dragon)dance rehearsal

 

de Matteo het natürlich na fötelis mit de Model mösse mache ;)

Katharina von paparazzis verfolgt 

Ich han na us es paar videoclips woni adem Abig gmachd han en chline video gmachd für die wos na meh intressiert we so e verastaltig dete so usgsehd. Hans leider nid fertigbracht s richtig schön korrekt bearbeite und chürze (will scho das bis ezt isch stundelang gange..) aber ich hoff ihr hend glich freud dra und vorallem natürli ade bilder :).





Ich mun unbedingt na churz vo oisem Open Day ide schuel verzelle. das isch würkli es lustigs Erlebnis gsi.. Ich han mösse es kantonesischs Lied mit minre Klass vor singe ( aber natürli auna en chline solopart ) und den hani au na mösse für d 'Fashion Show' laufe. Dass alli mir hoi seged und mich alächlet und winked weni durelaufe isch ja scho normal, aber so eppis hani würklich iminere ganze Zit da na nie erlebt.. Weni au scho nume halbwegs dusse uf de Bühni bin fangts ah schreie als wär ezt gad de Justin Bieber uf d bühni cho, oder de Elvis frühner.. Und werfed mir Küssli zue und dreied würklich halbe dure..Das isch würklich uh lustig ( hend aber es paar vo mine classmates glaubs nid so lustig gfunde und eini hani sogar zum hüle bracht will efachd sobaldi halbe dusse bin nimmerd meh uf epper andershd achtet.. da fühli mich scho uh schlecht, willi das selber ja au nid will) Ich selber stahn ehrlichgseit nämlich nid so gern im Mittelpunkt drum sind mir so Situatione eher unagnehm, aber trotzdem ischs es lustigs Erlebnis will das wirdmr suschd warschinli würkli nie erlebe. Nach de Modeschau hani nidmal meh chönne backstage gah willi scho ufghalte worde bin und den am glichige Fleck mindistens 1 Stund gstande bin und würklich nüme wegcho bin will plötzlich immer wider öpper nois nebed mir gstande isch und es Föteli gmachd het. Bisi den schlussendlich han chene zrug is Klassezimmer sind sicher eineinhalb Stunde vergange.. Da wirdi innerlich immer uh hessig und ungeduldig, aber logischerwis stahni den efachd dete und lächle brav..:) Sie meinets ja alli uh lieb, aber d Chinese hend den au na so e Agwohnheit dass nid efachd all zeme chend es Gruppefoti mache, sondern jede einzeln sis mun ha mit mir. Also bini den 400 fötelis spöter auna wider ide Umkleidekabine glandet.
d schuel het ganz vieli Videos devo ufegstellt, aber leider hani ken access zu dene..
da wär de link zum Video vode open ceremony, ich bin mir nid sicher eb ihr das chönd aluege, aber ich glaubs scho. Isch zimli es langs video, wenner ab 10 minute lueged den gsehndr oise 'action song' wonmr jede Morge hend mösse üebe.. SHINE JESUS SHINE!!!

http://www.youtube.com/watch?v=GjdB77_6z3E

  

s letste Mal de Action Song tanze 

Eppis wo mich würklich sehr beeidruckt isch we en guete Zemmehalt d Schuel het. Es isch würklich wie e grossi Familie. Ganz am Endi vom open day sind all Lüt scho gange gsi und mir hend alli müed Sache ufgrumt und den hends plözlich namal de Action Song laufe lah und mir hend überall egal wo mir gsi sind  gsunge und tanzet und obwohl mir de song eigentlich zerst lächerlich gfunde hend und nid würkli gern gmacht hend hets am schluss spass gmachd und ois alli zum lache bracht. das isch efachd so en schöne moment gsi dass mir fast träne cho sind. Das tönt ezt alles uh blöd und emotional, aber das isch efachd öppis wo mr ide Schwiz würklich fast gar nid het. So e Gmeinschaft , Zemmehalt und efachd Froid a so eppis chlinem. Ich merke selber im Moment uh fest we sehr ich ganz chlini Sache schätze,
au die wo ich nid unbedingt gern han, we zum Bispil Sache wo mit de Schuel da ztue hend. Ich meine ich gange würklich nid gern da id Schuel und glich gspüri öfters es Glücksgfühl weni efachd nume über de Pauseplatz laufe und Sunne schint.
Das tönt ezt echt alles zu übertribe und blöd. Vilichd bini au efach müed und das isch es Zeiche dass ich ezt sött ufhöre schribe. Obwohls sust na tonnewis z verzelle gäbti will im moment isch na relativ viel los bi mir. Ich sötti echt probiere echli öfters en Itrag mache den gäbtis au nid immer so viel woni uf einmal verzelle will :-)

oiri Deliah.