 |
| some of my classmates, my classteacher and me celebrating my birthday |
Hallo mini liebe :) ezt sind endlich mal die erschde zwei mönet ume und ich han denkd ich lahn wider mal eppis vo mir ghöre.. Also mir gahts scho es bizli besser will ich hans gfühl ich han efachd chli mini istellig gänderet und igseh, dassi das ezt hald efachd durezieh mun, mindischdens es halbs Jahr. Aber guet gahts mir nid. Es gaht mir ' gar nüt' . das heisst es gaht mir nid guet aber au nid uh schlechd, es isch im moment efachd es warte bis de tag chund won mich de Bogdan und Olivia chömed go bsueche.. und bisi den wider heiderf. Ich weiss das hört sich zimlich doof ah.. sone wahnsinnigs erfahrig derfe zmache und den ishmr nume da und wartet. Aber ja, so isches hald ezt bis ezt bi mir. Und das heisst nid dassi nüt lerne da, ich lerne sogar sehr viel. Und ich glaube genau darum willi jede Tag mit so viel Schmerz mun umgah. Ich mun ehrlich sege es het bis ezt na kein Tag gäh wo kei Träne gflosse sind, und ich bin normalerwis nid en Mensch wo weg jedem chline züg mun afange hüüle. Es isch au nid so dass mir Hong Kong nid gfallt. Hong Kong isch echd e meeega Stadt!!! Ich wohne 5 min vom Meer entfernt und glichzitig inere riise Stadt. Ihr alli denked warshinli a hochhüser und efachd kein einzige grüene Fleck da. Klar, es hett tuusigi vo Hochhüser und det ishd Luft au nid so guet und es gsehd au nid immer sehr schön us ( aber natürlich mega idrücklichmit dene Gebaeude !) und het efachd zu viel Lüüt.. Aber es het au wunderschöni Natur da. Es het efachd alles. Ich denke ich chans efachd nid gnüsse will mis Herz nid da bi mir isch. Sondern dihei ide Schwiz.
Ide Schuel ischs eiglich ziemlich langwilig, aber wo ish das sho nid eso... Ich han ziemlich vieli Freilektione woni id library chan gah. oder bessergseit mun. Das isch aber immer schön, denn hani Ziit chli Sache für mich zmache. Brief schribe, lese oder schlafe.. haha
Da hend alli Schüeler keis Problem demit ide Stund efachd zschlafe. Das isch uh luschdig, denn liegeds efachd mitm Chopf uf de Tisch und schlafet. Zu mir sind au alli sehr nett. Obwohli mun
sege dass mich zum teil au sehr nervt. Zum Bispiel wenni dur de Gang laufe und ueberall winkets und kicherets doof wenn sie sich getraut hend mir hoi zsege.. den weti mengisch efachd mini Rueh und bshluesse mich am Mittag für e halb stund is WC ih.. Die einzig Privatsphäre woni chan ha ish ufm WC.. Mir hend ledshd Wuche auna Sporttag gha und wonr fertig gsi isch ischs de Schüler erlaubt Fötelis zmache für e halb stund ( we grosszügig.. ), ich han eiglich wele shnell noimeds andrshd anne, aber da ich kein einzige Meter han chöne laufe ohni dass mich irgendwelchi Gruppene vo Meitli agsproche hend und gfreget ebs es Foti mit mir chend maches , bini schlussendlich eppe 45 minute spöter erschd gange . Verstönd mich nid falsch, ich han keis problem demit mit es paarne woni gar nid kenne es Föteli zmache, das freut mich ja au, aber mit sooo vielne wo alli keis wort sushd mit mir reded und efachd rash astönd zum es föteli mache, so als wäri irwie speziiell usserordentlich bsunders. kein mensch we alli andre odr so.. denn hani amix kei lushd meh zum lächle und immer sege ah jaa sicher :))))!!
Suschd verstahni mich mit de Schuelerinne imim Alter na guet. Det hani au es paar Kollegine, die sind uh lieb :) Aber Ziit zum epis mache oder so hend eiglich alli nid würklich, wills immer tönd Ufzgi mache oder mönd lerne.. Vorallem die ältere wils sich für die grossi Prüefig sho mönd vorbereite langsam.
Ich vermisses sehr mini Familie oder richtigi Fründe zha. Woni über alles chan rede und au lache und efachd all das womr sushd so für meh oder weniger 'selbstverständlich' empfindet. Vorallem weni amix alleige chli is Zentrum vo HK gang wos au vieli Europäer het und ich gsehn we irwie alli epper hend usserd ich wo alei umelaufd. Denn laufed amix efachd nume na Träne abe und ich finds na luschdig weni denke was echd die andre denked weni so huelend umelaufe. haha.
Wenmr so alleige isch die ganz Ziit wird mr scho praktisch zwunge zum schnell erwachse werde.
Was Kantonesisch agaht.. ich chan es paar Wörter und alli Zahle. und eppe 6 Schriftzeiche bis ezt. Nanig so viel.. isch würklich uh schwirig zum lerne mit dene 9 Tön und allem.. Weni eppis kantonesischs sege sind immer all uh begeisteret und findet ich bin uuuh gschid, während ich finde ich chan praktisch na nüt. Ich weiss au nid we viel ich schlussendlich würklich lerne vode Sprach aber ich gib uf all fäll mis beschde zum soviel we möglich lerne :)
Was suschd na eppis vom schwirigste isch, oder s schwirigste für mich faschd, isch kei Privatsphäri meh zha ( usserd die 10 min am Tag ide Duschi oder sushd ufm WC).. I Hong Kong lebed alli uf sehr chlinem Platz. Mini familie het verhältnissmässig na viel platz, was aber für ois immer na chli isch. Ich teile mis Zimmer mit minre Shwöschder und min Bereich bestaht usemene normale 90er bett.Und Türe isch sowiso nie zue usserd ide Nacht, aso null Privatsphäre. Mengisch macht mini Schwöschder au Ufzgi bis am halbi 1 .. Aso blibt hald bis den s Liecht ah.
Das wird definitiv nöd s beshde Jahr vomim Lebe, aber sicher eis vode Wertvollshde..
oiri Deliah
No comments:
Post a Comment