wie ich in Hong Kong wohne..

Hoi zeme! :)

Hüt nimi oi mal mit zu mir hei da in HK! Vode Bushaltistell bis i 'mis' Zimmer!

da gangi jede Tag uf de Bus :)

s gförliche tunnel..:-D

für die wo mir brief schribet amix - da inne landedr denn :)

oisi Huustüre..natürlich gschützt vo...

...oisem Rottweiler em Sailou ( = Bruder in kantonesisch)

da dun ich jede Abig gschirr wäsche.. (intressant ich weiss. )

abstellrum

Willkomme imim Berich... aiiya....

mini Boxe.. Vollgstopft we nüt.

so, also das isch min Weg gsi vode Bushaltistell zu oisem Hus und den na all zimmer vom Hus ( usserd das vode Eltere)  :)) Isch schona lustig, in Hong Kong wos vorallem tuusigi vo Hochhüser git chume ich ines Bungalow-mässigs Hüsli imene Dorf. Also Dorf isch relativ gseh, es isch sho es 'dorf' und gsehd au so us  aber es ish efachd gad ade hauptstrass ligend sozege. Oises Huus da isch für HK Verhältnis würklich sehr gross und d stube und chuchi sind eigendlich au na würklich gross.:) Was für mich würklich viel überwindig brucht het und ich mun sege ich han mich immer nanig richtig demit abgfunde isch dassi kei privatsphäri han wills da so üblich isch dass türe immer offe isch ( vorallem wenmr ezt zimmer teilet) und vode stube gsehdmr eim denn au.. Obwohl d platzverhältniss so chli sind hend doch na viel ustuschschüeler es eigets zimmer da, was den defür vilichd uh chli isch. Naja, ich freu mich warshinli am allermeishde wieder uf mini 4 Wänd ide Schwiz! :) das macht hald scho ganz viel us. Und au we die wo mich kenned wüssed duen ich gern mis zimmer gstalte und so und den tuets mir amix im Herzli weh ''min bereich'' eso zsgeh :-D

Wener oi vilichd chönd vorstelle gsehds ide Nacht zimli gfürchig us imim Dorf will es het au fash kei liecht hald und niemmerd isch umme drum hani bis vor 2 wuche immer am 9i mösse dihei si. Aber ezt chani einmal ide Wuche es bizli  lenger..:)

Im Moment gahts mir richtig guet! Ezt sind d examinations fertig und ich mun leider wider normal id schuel. Han au scho mini resultat zrugbecho und abgseh vo chemistry hani alles bestande und das ohni lerne. Und bi History bini sogar klassebesti idem Semester! da fregi mich ja echt was die andere falsch machet wenn ich ohni lerne so guet chan sii.. aber vilichd hend die ja alli au nid uf die prüefig glernt..:-)

Hoff oi gahts allne guet! Liebi Grüessli , oiri Deliah

my christmas holidays

FROHS NEUS JAHR !!!! <3
Ich hoff ihr hend alli en super start is 2013 gha! Ich chan gar nid glaube dass ezt scho januar isch  und wiehnachte verbi sind. Will ich mich na guet chan erinnere das min gastvater gseit het ja setz dir efachd mal Wiehnachte als ersts Ziel. Und ezt ischs scho verbi. Damals hani denkd wiehnachte werded nie cho und es wird ewigkeite bis denn gah. Aber ziit vergaht. Und au wens mir vieles immer na uh schwer fallt und es natürlich immer na öfters mal wider es tüüf git, gahts mir würklich einiges besser und ich han es guets Gfühl fürs 2013.Genau es halbs jahr wirdi in Hong Kong verbringe na und den es halbs wider ide Schwiz. Ich han s Gfühl au dass die zweit Helfti vomim Ustuschjahr um einiges besser wird.. Will wie ja au vieli Ustuschschüeler seged sind die erste 3 Mönet die schwirigste. Und so hanis au erlebt. Aber abm vierte ezt wirds bi mir immer es stückli besser. Und ich merke au würkli we d ziit vergaht. So also. eiglich hani idem Blogitrag mal wele chli über mini Wiehnachte und erste Ferie da berichte :).

Fangemr mal am 21. Dezember ah. Das isch min erste Ferietag gsi und de wichtigsti Tag im chinesische Jahr, de fallt natürli nid jedes Jahr uf de 21. Dezember, aber immerso um die Zit ume. Es heisst Dongzhi festival und es wird sozege de Tag gfiret wo s Tagesliecht und Sunneshi am chürzishde ish und nach dem Tag werded Täg wider lenger, also lenger Tag als Nacht. Das het e wichtigi Bedütig gha frühner vorallem für Buure, will ab den für sie s mit de Ernte wider besser lauft. Ufallfäll hemmir am Abig denn es grosses family gathering gha und natürli widr tonewis chinesisches esse gesse. Ich han aber leider d helfti vom family gathering verpasst will ich für AFS han mösse ade Central MTR station Wiehnachtslieder singe.. Jedes Land het mösse i sinre Sprach es Lied singe. Mir hend den Zimetstern hani gern usgwählt.

Über wiehnachte hani bimim Support Contact dörfe übernachte. Also bini nidemal mit minre Gastfamilie gsi, was au nid wichtig isch will mir sowiso kei Wiehnachte gfiret hend ( obwohl mir en künstliche wiehnachtsbaum hend i oisere stube..). Schad, aber epis guets hets au es wird eim de ganz vorwiehnachtlichi stress erspart. Die 2 Täg sind wohl die allerschönschde gsi imim Ustuschjahr bis ezt. Wieni ja schomal gschribe han, fühli mi würkli richtig wohl mit de Familie vomim Support Contact. Am 24. bini zerst mit de Michelle in Fish Market ( also fürs Aquarium ;) ) go fischlis aluege und det hets au ganz viel Hünd und Chatze zum verchaufe. Das isch e Strass wo nume so Tier-,vorallem Fisch,läde het.  Den bini no fein go Zmittag esse mit ihre und sie het mir dasmal au wider zwei neui sache zeiget nemlich steamed egg und steamed milk. isch na uh fein. steamed egg isch ähnlich we ei im töpfli, für die wo das kenned,aber efachd süesser. Nacher simr heigange zu ihre woni scho vom Kelvin erwartet worde bin und er het mir sofort stolz 'mis Zimmer' fürd nacht zeiget. Es isch eigli s zimmer vom sohn aber de hends für d nacht efachd mal weggshikd :D haha. Spöter wod Imelda heicho isch hemr ois den uf de Weg gmachd zum go esse imene feine chinesische Resti. Und nacher hends mir de Peak zeiget. Endli nach 4 Mönet hanis au mal det ufe gshaft! Het sich würkli glohnt, isch e wahnsinnigi Ussicht. Nacher simer müed heigfahre und dihei hets namal glace und guetzli gäh und d Imelda isch den au is Bett. Ich bin nachli wach blibe und han mitm Kelvin lang gredet und am 2 ide Nacht simer den zeme use gange in McDonald go esse. Er macht das ebe öfters da er ide Nacht nid schlafe chan will er normalerwis immer schafet ide nacht. Isch uh spannend gsi für mich. S erste mal so spat dusse und er het mir mal zeiget wes so zmitst ide Nacht usgsehd in Hong Kong. Sie wohnet ebe uf HK Island drum ishs det au gar nid gföhrlich und grad ide nöchi vode MTR station und hald uh zentral. In Hong Kong hets uh viel Läde/Restis wo 24 Stunde offe hend. Zum Bispil de 7Eleven ( e art kiosk aber viel besser! ) und McDonald aber au richtigi Restis. Mir sind auno schnell ines Hot Pot Resti gange und tatsächlich sind am halbi 3 na fashd all Tisch bsetzt gsi und d lüüt hend fröhlich und munter Hot Pot gesse.. so als wärs nid zmitst ide Nacht. das het mr würkli uh gfalle.:) am 3 bini den au endlich go shlafe und am negshde Morge hani cookies bachet mit de Imelda. Und zum Zmittag simer den auna go Korean BBQ esse alli zemme. Uii mit dere Familie isssi wahnsinnig viel und guet! also ich bin eigli weni wach bin nume am esse..aber so sets ja au sii als en ustuschschüeler, oder?  Dur die 2 Täg hani erlebt wie s lebe da au na chenti si.. Sie  gönd gern uswärts go esse und unternähmed eppis, während mini Familie da eigli immer dihei isch, zeiget mit vieli neui sache und freget nach minre meinig, anstatt mir zbefehle DUSCHE! GSCHIR ABSPÜLE! ( das macht mis gastmami da, aber das ish nid würkli bös gmeind,so sind vieli chinesischi müettere..).Au hani dete für e Nacht mis eigete Zimmer gha, was mich überglücklich gmachd het und mir nur na meh zeigt het we fest ich das vermisse und sie hend mir au gad gseit gha ich chan ruhig türe zuemache und so weni rueh bruche wasi bi minre gastfamilie hald nie richtig chan.

Am zweite Tag bi minre support contact familie sind mir ständig Träne ide Auge gsi wili gwüsst han dasi am Abig wider heimun. Und woni den gange bin het Imelda uh fest mösse afange brüele.. Naja. Ich chan uh froh si dasi wenigstens ab und zue zu ihne derf :)



fish market in prince edward

allersüessischdi babyhündlis wo uf eim quadratmeter lebet und warshinli tötet werded wens niemerd chaufd unds nüme herzig sind..:(( giz ja i vilne länder.. zum glück ide schwiz nid..

steamed milk and egg



christmas eve dinner



<3 <3 <3

midnight mc donald und gueti gspröch mitm kelvin :)

korean bbq! ( da brötletmr sich s fleisch selber uf dene plattene JUMMY)

Ide Ferie bin ich au s erschde Mal da go Karaoke singe mit es paar ustuschschüelerinne und ere chinesische familie, das isch würklich uh lustig. Mer het den efachd so en ruum für sich selber und chan det es paar Stunde singe und bechund au na en Zmittag. Während mir Ustuschschüeler zu irgendwelche hip hop lieder wo den mengish au nid so abrachti wörter dringha hend gsunge und tanzet hend, het die chinesish familie wo mit ois cho ish dramatischi kantonesischi liebeslieder richtig mit Gfühl luut mitgsunge.. isch es bizli peinlich gsi für ois aber glich richtig lustig :)

Denn bini ide Ferie au na mit es paar Ustuschschüeler anen Wiehnachts/Winterball. Da giz würkli tuusigi so Winterbäll, es paar Ustuschschüeler hend gseit sie seged eppe uf 3 Bäll gsi. Isch würkli interessant gsi zum gseh we das da so isch. Ich han mir den brav es längeres chleid agleit wili denkd han die ziehnd sicher nid so ganz churzi ah, aber überaschenderwiis hend die meishde meitli so richtig knappi chleider ah gha...Hani gar nid erwartet. D Männer sind natürlich im Azug cho.. Womr in Ballruum inecho sind ish grad mal eis Pärli am tanze gsi - kes Wunder, es sind nämlich nume truurigi Liebeslieder gloffe.. Also simer den efachd we de rest an rand use gsesse.. I eim egge hend es paar 'heimlich' irgendwelchi shots abegleert demits vilichd chli lustiger wird - heti ezt au nid unbedingt erwartet da. De ganz abig isch eiglich würkli eher sehr langwilig gsi aber glich interessant zum das efachd mal erlebe.

A Silvester bin ich mit de Viktoria, Olga und ihrem Fründ Percy go s allerfeinschde Häagen-Dasz schoggi fondue esse und den spöter no is ältiste chinesische resti in Central go Znacht esse und danach nach Tsim Sha Tsui go de Countdown luege..  ( ich han usnahmswiis mal derfe usgah sooo lang haha ^^) Zum Glück hend anderi AFSer sho lang det ide erste reihe en platz freighebet und mir hend den derfe zu ihne.. ishes uh gedränge und gedruke gsi aber ja mir hend hald de countdown mal wele erlebe:) isch scho guet gsi und shön zum mal gseh aber isch ezt au nid uuuuh mega speziell genial gsi. Ufallfäll hani da gar kes festlichs Neujahrsgfühl gha. Nacher hani für de Heiweg 3 stunde gha wil ales verstopft gsi ish vor lüüt aber einmal mun das hald si!:)



new years eve dinner im ältiste chinesische resti in central :-)





HAPPY NEW YEAR!!!!!!

Sust hani ide Ferie vorallem efachd anderi Ustuschschüeler troffe, all local students sind hald am lerne gsi.. Will jetzt gad nach de Ferie hend d Examinations agfange bi de meiste Schuele.. Also sind die ide wiehnachtsferie eigli nume am lerne. Das isch scho krass, den hetmr mal ferie aber mun glich lerne. Und ezt hani sho 5 Prüefige da gshribe. Ich han mich sho die ganze Ferie uf die Examziit da gfroit will ich den höchstens 2 stunde pro tag schuel han und sust frei und mengish au ganzi tääg frei. Glernt hani nid würklich.. Das ish für englisch au nid nötig, gshicht hani hüt gha und ganz es bizli glernt aber fashd nüt. Ich mun sege hetis glert heti sicher fash volli punktzahl gha ( so we letsti gshichtsprüefig woni ohni lerne die best gsi vode ganze klass..) will die prüefige da sind sooo eifach im verglich zude shwiz( also ezt gschicht ufalfäll..). Aber das wird den warshinli in form 5 und 6 shochli shwiriger. Naja mal luege wes mir ide nöchshde Wuchene na wird ergah bide exams.. Bis ezt hani di meishd prüefigszit mit shlafe verbracht..
Oiri Deliah